查看素材詳目

台語漢字: 塗炭逝
台羅拼音: thôo-thuànn tsuā
華語詞目: 煤炭層
詮釋:
(台語漢字)
指塗炭層礦脈。塗面出皮有看現現的塗炭逝，表示內面可能有塗炭，會選這位磅開，挽瓜揫藤揣內面的塗炭逝。塗炭逝有的層較厚，有的層較薄，欲知影大細逝就繼續磅。有的若磅若深，真深才拄有塗炭濟的厚層，有的較淺就拄著厚層逝，這成本上省，逐家會呵咾講主人家有福氣。
1.磅開pōng khui、挽瓜揫藤bán-kue-tshiû-tîn、揣tshuē、呵咾o-ló
2.出皮：塗炭逝佇塗表。

(華語)
煤層礦脈是沉積岩(水成岩)，層狀。有些煤炭層露土，表示裡面可能有煤炭，會選這位置炸開，順藤摸瓜找到煤炭層。煤炭層有厚層、薄層，厚層量多，薄層量少，要知道炭層量多或少就要繼續炸開。有的炸到很深才有厚層，有的不遠就有厚層，這成本最省，大家會稱讚老闆有福氣。

採錄對象: 王新全
採錄與彙整：許麗荀
總審定: 王桂蘭博士

查看素材詳目

台語漢字: 烏龜尾
台羅拼音: oo-ku bué
華語詞目: 掘進
詮釋:
(台語漢字)
塗炭坑跤踏路上尾溜的意思，簡稱烏龜仔，來自日文：奧，おく/上內面，ooh-khoh→ooh-khuh的轉音加『尾』。烏龜尾離坑口上遠，空氣較薄，工課上危險，薪水嘛上懸。遮做的是開坑磅石的工課，一組工班做伙做，愛佇岩壁鑽出磅子空，埋磅子磅開炭壁，石粉會特別濟，佇遮上𠢕帶砂肺，無適合做傷濟年。
1.工課khang-khuè、懸kuân、佇tī、磅子pōng-tsí、𠢕gâu、帶砂肺tài sua-hì、傷濟siunn tsē
2.跤踏路：炸開岩壁後清理出廢石的坑洞可走動空間。
3.砂肺：矽肺病、肺塵病、黑肺症，肺部纖維化疾病，部分肺部無法工作而喘不過去。
(華語)
煤炭道最底端盡頭之意，來自日文：奧，おく/最裡面，ooh-khoh→ooh-khuh的轉音加『尾』。掘進位置離坑口最遠，空氣較稀薄，工作最危險，薪水也最高。這裡做的是掘進爆破的工作，一組工班一起做，要在岩壁打出炸藥孔，埋炸藥炸開煤壁，石塵特別多，在這裡最容易得矽肺病，不適合做很多年。

採錄對象: 王新全
採錄與彙整：許麗荀
總審定: 王桂蘭博士

查看素材詳目

台語漢字: 磅子間
台羅拼音: pōng-tsí king
華語詞目: 放置開坑爆破物品的空間
詮釋:
(台語漢字)
囥開坑爆破的物件，主要是磅子、殼仔、殼仔線/磅石索仔、發爆器……。磅子長條形，15~20公分長。殼仔，一頭櫼入磅子內，磅子空外留一節，通接磅子線。磅子線是一般電線，分正電、負電兩條線，磅子線至少50公尺，另外一頭接發爆器，控制爆炸的開關。
1.囥khǹg、櫼tsinn
2.磅子：美、日、台製規格無啥仝，Ø大約1英吋。
殼仔線：雷管(kháng)，分瞬間雷管、延時雷管1/1000~12/1000秒

(華語)
放置開坑爆破的物品，主要是炸藥、雷管、引線、爆破器……。炸藥長條形，大約15~20公分長。引線，一頭塞入炸藥內，炸藥孔外留一節，接炸藥線。炸藥線是一般電線，分正電、負電兩條線，炸藥線至少50公尺長，另外一頭接爆破器，控制爆炸的開關。

採錄對象: 王新全
採錄與彙整：許麗荀
總審定: 王桂蘭博士

查看素材詳目

台語漢字: 磅子空
台羅拼音: pōng-tsí khang
華語詞目: 炸藥孔
詮釋:
(台語漢字)
磅岩壁，需要鑽空櫼入磅子爆破。磅子空用鴨頭裝尖頭抑是平頭鴨頭磅支鑽深空，延層坑道上深鑽2米，岩石坑道上深鑽1米。爆破岩壁需要鑽5~10外空，愛看岩石材質，空之間差不多30~40公分。一个空囥4~5支磅子，上外口接殼仔線/kháng，1/1000秒的kháng囥上中央的磅子空，外圍的線慢一屑仔，上慢12/1000秒，中央的先磅，外圍的磅石才會塌落中央位。
1.延層坑道iân tsân khenn-tō、岩石坑道gâm-tsio̍h khenn-tō、一屑仔tsi̍t-sut-á
2.延層坑道：延著已經咧挖塗炭的逝/層。
3.岩石坑道：較硬的岩壁層。

(華語)
炸岩壁，需要鑽孔塞入炸藥爆破。炸藥孔用鑿岩機裝尖頭或是平頭鑿岩鐵棒鑽深孔，延層坑道最深鑽2米，岩石坑道最深鑽1米。爆破岩壁需要鑽5~10個孔，要看岩石材質，孔之間差不多30~40公分。一個孔放4~5支炸藥，最外頭的接雷管/kháng，1/1000秒的kháng囥最中央的炸藥孔位，外圍的線慢一些些，上慢12/1000秒，中央的先爆開，外圍的磅石才會塌落中央位。

採錄對象: 王新全
採錄與彙整：許麗荀
總審定: 王桂蘭博士

查看素材詳目

台語漢字: 牛牢仔
台羅拼音: gû-tiâu-á
華語詞目: 支撐架
詮釋:
(台語漢字)
用相思仔柴抑是鐵架做的支架。有牛牢仔的所在，人才會當佇下面工作，較無危險。相思仔柴較韌、耐用，若有落坎，柴會有沓沓仔遏斷的聲，予坑內的人有較濟時間走出去，是牛牢仔重要的材料。欲開坑爆破進前，愛先做牛牢仔。無仝柴箍數，會講做3節牛牢仔，5節牛牢仔。
落坎lo̍h-gám、沓沓仔ta̍uh-ta̍uh-á，遏斷at-tn̄g

(華語)
相思樹或鐵架做的支架。有支撐架的地方，人才可以再下面工作，較無危險。相思樹較強韌、耐用，若有落岩磐的情況，相思樹會慢慢發出折斷的聲音，讓坑內的人有較多時間跑出去，是支撐架重要的材料。欲開坑爆破之前，要先做支撐架。不同枝數，會講做3節支架，5節支架。

採錄對象: 王新全
採錄與彙整：許麗荀
總審定: 王桂蘭博士

查看素材詳目

台語漢字: 鋪鐵枝
台羅拼音: phoo thih-ki
華語詞目: 鋪鐵軌
詮釋:
(台語漢字)
鋪枕木仔、鐵枝通運搬廢石仔、塗炭。牛牢仔做好，才會當鋪鐵枝，有鐵枝才有法度將磅開了後一大堆的廢石仔裝車一台一台運搬出去，清出跤踏路。靠鐵枝路運搬出去較省力省時，古早時用拖籠，人若狗咧爬共拖到巷道口，才裝入炭車的真辛苦。毋過，炭空收起來了後，鐵枝無咧用，拄著鐵仔價數好，就拆起來賣掉矣。

(華語)
鋪枕木鋪鐵軌以搬運廢石、煤炭。支撐架架好之後，才能鋪鐵軌，有鐵軌才能將爆開後大量的廢石裝一台台車搬運出去，清出坑道。靠鐵軌路搬運出去較省力省時，早期是用人工挑出去的很辛苦。毋過，礦坑收起來後，鐵軌沒在用，碰到鐵價好，就拆起來賣掉矣。

採錄對象: 王新全
採錄與彙整：許麗荀
總審定: 王桂蘭博士

查看素材詳目

台語漢字: 分路門
台羅拼音: hun-lōo-mn̂g
華語詞目: 岔道、轉轍器
詮釋:
(台語漢字)
對一條鐵枝路線閣搝出一條鐵枝路線的設備。
原底直直行的線，號做「正線」，另外搝出來的，號做「分線」。若是欲撨正線抑是分線，愛扳（pan）一个機械。無論輕便車抑是大火車，攏有這款設備。
1. 受訪者上早佇炭空內底修理鐵路，知影各項設備的的名詞。
2. 若照筆者的經驗，這个講法全臺灣無一致，平溪講的「分路門」佇別位毋捌聽過，算做是新發現。

(華語)
從一條鐵路再拉出另一條鐵路線的設備。
繼續直行的路線，稱做「正線」。另外拉出來的，就稱做「分線」。若是要切換正線或分線，需扳動一個機械。無論輕便車或臺鐵，都有這樣的設備。
1. 受訪者最早在炭坑內修理鐵路，知曉各項設備的名詞。
2. 若照筆者的經驗，這個說法全臺灣沒有一致，平溪所稱的「分路門」不曾在別的地方聽過，算是新發現。

採錄對象: 王新全
採錄與彙整：黃偉嘉
總審定: 王桂蘭博士

查看素材詳目

台語漢字: 斬木仔
台羅拼音: tsám-bo̍k-á
華語詞目: 枕木
詮釋:
(台語漢字)
是鐵枝路下跤苴的物件。
較早是用柴做的，對別位運入來平溪，除了相思仔以外，品質較好的hi-nóo-khih較袂緊漚。後來改用紅毛塗，也就是水泥做的，一支一支長短拄仔好。在地人另外補充講枕木仔算是高級的物件，炭空外口才有咧用。
1.受訪者清楚表達枕木仔的用途佮材質的變化。
2.若照筆者的經驗，這个講法全臺灣一致，《臺日大辭典》是收chám-bo̍k（斬木）。採訪的過程，「tsám」、「tsán」這兩種讀音攏有出現。

(華語)
是鐵軌下面舖墊的東西。
最早是用木頭做的，從外地運進平溪。除了相思樹以外，也有品質較好的檜木，耐久不易壞。後來改混凝土（水泥）製的枕木，優點是一支一支長短都一樣。在地人另外補充道枕木算是高級的物件，只用在礦坑外頭。
1.受訪者清楚表達枕木的用途與材質的演變。
2.依照筆者的經驗，Tsán-bo̍k-á的講法全臺灣一致，《臺日大辭典》則收chám-bo̍k（斬木）一字。採訪過程中，「tsám」、「tsán」這兩種讀音都有出現。

採錄對象: 王新全
採錄與彙整：黃偉嘉
總審定: 王桂蘭博士

查看素材詳目

台語漢字: 砂肺
台羅拼音: sua-hì
華語詞目: 塵肺症
詮釋:
(台語漢字)
砂肺，是一種因為職業引起的病症。
根據王新全村長講，tī炭空內底真熱，炭工攏穿內衫、內褲咧做工課，挖炭的時陣真濟粉塵，大部分炭工攏無掛喙罨，上加用面巾綁 tī喙。
砂肺，是因為粉塵牢咧身軀內底，時間濟久，會那來那嚴重，炭工食老的時需要
sàng-sooh佮食各種藥劑來度過年老的時間。
　　
(華語)
塵肺症，是一種因為職業而引起的職業病。
根據王新全村長說法，在礦坑內很熱，礦工大都只穿內衣內褲工作。挖礦時，會有很多粉塵，礦工都沒戴口罩，頂多用毛巾綁在嘴巴上。
塵肺症，是因為長久吸入粉塵，時間一久，會越來越嚴重，
當礦工年老時，甚至需要靠氧氣筒與吃各種藥劑來度過餘生。

採錄對象: 王新全
採錄與彙整：陳美家
總審定: 王桂蘭博士

查看素材詳目

台語漢字: 大斜坑
台羅拼音: tuā-tshiâ-khinn
華語詞目: 大斜坑
詮釋:
(台語漢字)
因為菁桐的塗炭愈挖愈深，欲共塗炭捒到坑口和車頭攏誠了工，為著欲方便共塗炭送到地面，才開石底大斜坑來運搬。
大斜坑口有安天車，若是裝塗炭，共炭車相連接，天車一改通絞24隻炭車起去，若是貯石頭，因為石頭較重，一改會當搝14隻起去。
大斜坑的斜度有15度，用人工來捒是足困難的，愛用機器來鬥相共。

(華語)
菁桐的煤礦愈挖愈深，將煤礦運送至坑口及車站很費力氣，為了要方便將煤炭送至地面，才建造石底大斜坑來運送。大斜坑口有架設天車，若是裝煤炭，將裝煤車相連，天車可一趟拉24輛裝煤車上去；如果載的是較重的石頭，則是一趟拉14台車上去。大斜坑的斜度有15度，難以靠人力來把車推上去，得用機器相助。

採錄對象: 王新全
採錄與彙整：鍾育紋
總審定: 王桂蘭博士

查看素材詳目

台語漢字: 反猴
台羅拼音: píng-kâu
華語詞目: 翻車機
詮釋:
(台語漢字)
對炭空出來的炭車真重，愛借用機器來鬥共塗炭倒出來，反猴就是咧共炭車反180度的機器。
炭車攄到位，捒入去反猴，踅半輾，塗炭就會落落去囤做規堆。
在地人補充，反猴是較落尾才出現的機器。

(華語)
從礦坑出來的裝煤車很重，須借用機器以協助將煤礦倒出來，翻車機就是將裝煤車翻轉180度的機器。裝煤車送到定點，推進翻車機，轉半圈，煤炭便會落下成堆。在地人補充，翻車機是較後期出現的機器。

採錄對象: 王新全
採錄與彙整：鍾育紋
總審定: 王桂蘭博士

查看素材詳目

台語漢字: 石粕堆/假山
台羅拼音: tsio̍h-phoh-tui/ké-suann
華語詞目: 捨石山
詮釋:
(台語漢字)
挖塗炭的過程嘛會挖真濟石頭出來，挖出來的石頭會車去較懸的所在來倒。
在地人補充，車石頭的車仔和裝塗炭的炭車無仝，車內下底的彼塊枋仔毋是平的，是倒v的形。車石頭的車仔車到崎仔頂，栓仔hőng拍開，下底的枋仔就會開開，規車的石頭就落落崎。
一段時間了後，囤的石頭就會滇起來，成做誠大的石粕（phoh）堆，親像假山彼款。

(華語)
挖炭的過程也會挖出許多石頭，挖出來的石頭會推至較高處傾倒。當地人補充，裝石頭的車和裝煤車不同，車底的板子不是平的，是倒V形。石頭車推至高處，暗鎖被打開，車底的板子就打開，整車的石頭便會掉落出來。堆積一段時間後，石頭就會滿起來，堆成很大一堆，如假山一般的石堆。

採錄對象: 王新全
採錄與彙整：鍾育紋
總審定: 王桂蘭博士

查看素材詳目

台語漢字: 洗身軀間
台羅拼音: sé-sin-khu-king
華語詞目: 洗浴間、浴室
詮釋:
(台語漢字)
佇炭空工課做煞，規身軀攏烏嘛嘛。因為炭空內底溫度真懸，有的炭工仔人穿內衫、內褲就入空。
炭工仔人出炭空了後，會先去洗身軀間洗身軀，才閣轉去厝。洗身軀間嘛有分一爿是查埔的、一爿是查某的。
早前查某的嘛會當入炭空做工課，有的閣比查埔的較𠢕做，毋過民國53年政府規定查某的袂當入炭空，in就改做外口工。

(華語)
在礦坑工作後全身都黑的，因為礦坑內溫度很高，有的礦工著內衣褲便入坑。礦工出坑後會先去洗浴間洗澡，身體乾淨再回家。洗浴間也有分一邊是男生的、一邊是女生的。因為早期女性也可入坑當礦工，有的表現得還比男性好，但民國53年政府規定女性不得入坑，她們就改做礦坑外的工作。

採錄對象: 王新全
採錄與彙整：鍾育紋
總審定: 王桂蘭博士

查看素材詳目

台語漢字: 洗炭
台羅拼音: sé-thuànn
華語詞目: 洗炭
詮釋:
(台語漢字)
塗炭和濫做伙的石頭摒入去洗炭機的水溝仔，水溝仔會有水流過，塗炭較輕，佇水裡會流過去，石頭就沉落去。
洗炭了愛揀炭，佇選塗炭區，查某工會分三逝，中逝的抾石頭，兩爿的抾塗炭。
洗炭、選炭和捒大路車的工課大部份是查某人咧做的，佇選炭區揀出來的石頭，落尾會送去石phò堆，塗炭就貯佇大路車捒去車頭。

(華語)
煤炭和參雜其中的石頭倒進洗炭機的水溝裡，水溝裡會有水流過，煤炭輕就流過去，石頭便會沉沒。洗炭後便是選炭，選炭區的女工會站成三排，中間的挑石頭，兩邊的撿煤炭。洗炭、選炭和推大路車多半是女工在做的，在選炭區選好的石頭最後會推到捨石山，煤炭則是裝在大路車推去火車站。

採錄對象: 王新全
採錄與彙整：鍾育紋
總審定: 王桂蘭博士

查看素材詳目

台語漢字: 風車
台羅拼音: hong-tshia
華語詞目: 抽風機
詮釋:
(台語漢字)
風車安佇炭空的風空，是用來共炭空的空氣抽出去的機器。
逐日早起六點半，炭工仔人愛入去炭空做工課。佇in入去進前，檢測的人員著愛先用機器檢查炭空內底的瓦斯會傷懸無，若會就愛緊用風車挽風出去，予炭空內底的空氣敨，若無，就有可能會爆炸。
逐工咧做的炭空較袂有瓦斯傷濟的問題，毋過若歇年仔節仔過，幾若工無人入去的炭空，這部份著愛較細膩。

(華語)
抽風機設在礦坑的出風口，是將礦坑內空氣抽出去的機器。每日清晨六點半，礦工要入坑工作。在他們入坑前，檢測人員得先用機器檢查坑內瓦斯是否過高，如果會便得趕緊用風車將氣抽出去，使礦坑的空氣得以流通，不然可能會爆炸。每天都有在挖礦的礦坑比較不會有此問題，但若逢過年過節歇數日沒做的礦坑，瓦斯過量的問題便要注意。

採錄對象: 王新全
採錄與彙整：鍾育紋
總審定: 王桂蘭博士

查看素材詳目

台語漢字: 掘仔
台羅拼音: ku̍t-á
華語詞目: 十字鎬(兩頭尖)
詮釋:
(台語漢字)
炭工仔人紮入去炭空的家私頭仔真濟款，其中雙頭尖的掘仔是用來掘塗炭的。
另外，有一種孤一爿尖的叫做大掘(華語嘛叫做『十字鎬』)，是用來掘石頭的。斧頭是咧相思仔的時，提來刜柱仔用的。家私頭仔猶有沙耙仔、沙挑……，是用來𣁳塗的。遮的家私頭仔是炭工仔人家己攢的，若是鈍去著愛磨予利，工課才會順序。
在地人補充，落尾炭工仔人用的工具，就發展到毋是完全用人工的方式來掘塗炭。

(華語)
礦工帶進礦坑的工具有很多種，其中雙頭尖的十字鎬叫「掘仔」，是用來挖煤的。另外，有單一邊尖的十字鎬叫「大掘」，是掘石頭用的。斧頭則是立相思樹枝時，拿來砍成柱子用的。工具尚有耙子、圓鍬等，是用來鏟土的。這些工具是礦工自己準備的，若鈍了須將之磨利，工作才好進行。在地人補充，之後礦工使用的工具，就漸漸發展到非純用人力的方式來挖煤礦。

採錄對象: 王新全
採錄與彙整：鍾育紋
總審定: 王桂蘭博士

查看素材詳目

台語漢字: 連工
台羅拼音: liân-kang
華語詞目: 連工
詮釋:
(台語漢字)
炭空的工課是對早起六點半入去開始做，工課做完就會當出炭空，按呢是做一工(kang)，入去會先講恁這組的愛做幾車，較𠢕做的有的三點鐘就做煞，有的愛做四、五點鐘。
若是咧趕工課抑是想欲加趁一寡錢的，會留佇炭空內相連紲做兩工(kang)，就是閣加做五點鐘，按呢就叫做連工。
連工就是早起六點半入去炭空，暗時日頭落山矣才出來。

(華語)
礦坑的工作是從早上六點半入坑開始做，工作完成就能出礦坑，這樣稱為做一工，進坑前會先說好你們這組要做幾車，比較會做的有的三小時就做完，有的要做四、五小時。不過若在趕工或是想多賺點錢，會留在礦坑中接第二工繼續做，再做五小時，此即連工。所以連工便是早上六點半入坑，出坑時太陽已經下山。

採錄對象: 王新全
採錄與彙整：鍾育紋
總審定: 王桂蘭博士

查看素材詳目

台語漢字: 帽仔
台羅拼音: bō-á
華語詞目: 帽子
詮釋:
(台語漢字)
佇炭空裡，炭工帽仔無仝的色水代表無仝的角色。
炭工仔人戴的帽仔是黃色的；藍色的帽仔是機電、維修的人咧戴的；戴白色的帽仔就是工頭、做監督的。
帽仔頂有安電火(hér)，因為炭空內底光線無夠，愛靠帽仔頂的電火來炤光。彼電火是用pa̍t-té-lih飼的，差不多用12點鐘久就無電矣。

(華語)
礦坑中，礦工帽不同的顏色代表不同的角色。礦工戴的帽子是黃的；藍色帽子是機電、維修人員戴的；戴白色帽子的是工頭、監督者。帽子上有裝電燈，因為礦坑中光線不足，需要靠帽子上的燈來照明。那燈是用電池充電的，大約用12小時就沒電了。

採錄對象: 王新全
採錄與彙整：鍾育紋
總審定: 王桂蘭博士

查看素材詳目

台語漢字: 落坎
台羅拼音: lo̍h-gám
華語詞目: 落磐
詮釋:
(台語漢字)
佇炭空裡做工課有無仝的災害，落坎是炭空崩落來的狀況，對炭工仔人的性命有真大的危害。
欲挖炭進前，愛先做oo-ku-bué共路開出來，相思仔予炭空較固定咧，尾手掘炭的人才入來。在地人補充講，有當時仔去掘著落屎炭，一下仔落來的塗炭太濟，抑是石股落落來，發生炭工仔人hőng硩死的災害。
炭空欲崩進前，相思仔會kinn-kinn-kuāinn-kuāinn有聲，若準相思仔袂擋得，攏曲落來矣，這陣就愛緊走，落坎有當時仔會足緊的，動作傷慢會走袂赴。

(華語)
礦坑的工作有不同的災害，落磐是指礦坑崩落的情形，對礦工的生命危害很大。要挖炭前，掘進是指開路的工作，再架相思樹枝來穩固坑道，最後挖炭的工人再進來。在地人補充，有時挖炭挖到拉屎炭，一下子掉下太多煤礦，或是落下石股，造成壓死礦工的災害。礦坑崩塌前，相思樹枝會有悉悉穌穌的聲響，如果相思樹枝無法支撐而彎曲，這時就得快跑，因為落磐的速度可能很快，動作慢就來不及跑。

採錄對象: 王新全
採錄與彙整：鍾育紋
總審定: 王桂蘭博士

查看素材詳目

台語漢字: 跤踏
台羅拼音: kha-ta̍h
華語詞目: 道
詮釋:
(台語漢字)
挖塗炭會佇炭空內底挖真濟條無仝的路，予挖炭較方便進行。
菁桐坑的炭空離地面較近的有一片道(it-phìnn-tō)，嘛叫做第一跤踏。閣落去有二片道，嘛叫做第二跤踏，三片道就是第三跤踏。較厚徼兆(khiò-tiō)的入空無講四，因為和死的音欲仝，所以閣落去彼沿毋是叫第四跤踏，改共叫三片半，就是第三跤踏半。
數字愈濟的跤踏就愈深落去，離地面就閣較遠。

(華語)
採煤會在礦坑中挖很多條路，使採煤好進行。菁桐礦坑離地面較近的有一片道，也稱為第一腳踏。更深下去有二片道，也稱為第二腳踏，而三片道就是第三腳踏。比較迷信的是入礦坑不提四這個字，因為和死字音近，因此再下去那層就不叫做第四腳踏，改稱做三片半，即為第三腳踏半。數字愈大的腳踏便在愈深處，離地面更遠。

採錄對象: 王新全
採錄與彙整：鍾育紋
總審定: 王桂蘭博士